ສະຖາບັນກິລາ-ກາຍຍະກຳ ● Institution of Sports
ຄວາມເປັນມາຂອງ ສບກ
ກ່ຽວກັບສະຖາບັນ ປະຫວັດຄວາມເປັນມາຂອງ ສະຖາບັນກິລາ-ກາຍຍະກຳ
ວິໄສທັດ ແລະ ບຸລິມະສິດ
ພັກ ແລະ ລັດຖະບານໄດ້ຖືເອົາວຽກງານກິລາ-ກາຍຍະກຳ ເປັນວຽກງານໜຶ່ງທີ່ເປັນບຸລິມາສິດ, ເປັນພາຫະນະຕົ້ນຕໍ ໃນການພັດທະນາຊັບພະຍາກອນມະນຸດ ແລະ ທັງເປັນປັດໃຈທີ່ສຳຄັນຂອງການຜະລິດ ທີ່ມີລັກສະນະຕັດສິນການພັດທະນາຊັບພະຍາກອນມະນຸດ ແນ່ໃສ່ຍົກຖານະບົດບາດຂອງຊາດ; ເພີ່ມທະວີຄວາມສາມັກຄີ, ມິດຕະພາບ, ການຮ່ວມມືກັບບັນດາປະເທດ ອານຸພາກພື້ນ ພາກພື້ນ ແລະ ສາກົນ.
ເປັນສະຖາບັນໃນການກໍ່ສ້າງ ແລະ ພັດທະນາບຸກຄະລາກອນການກິລາ ແລະ ນັກກິລາໃຫ້ກາຍເປັນມືອາຊີບ ໃຫ້ທຽບເທົ່າມາດຕະຖານຂອງອານຸພາກພື້ນ, ພາກພື້ນ, ສາກົນ
ການສ້າງຕັ້ງສະຖາບັນ
ເພື່ອຕອບສະໜອງແນວທາງນະໂຍບາຍຂອງພັກ ແລະ ລັດຖະບານ, ຜັນຂະຫຍາຍວິໄສທັດຮອດປີ 2030 ຍຸດທະສາດ 2025 ແຜນພັດທະນາຂອງຂະແໜງການສຶກສາ ແລະ ກິລາ 5 ປີ ຄັ້ງທີ VIII ແຕ່ປີ 2016-2020 ແລະ ແຜນຍຸດທະສາດພັດທະນາກິລາ-ກາຍຍະກຳ ກະຊວງສຶກສາທິການ ແລະ ກິລາ. ໄດ້ອອກຂໍ້ຕົກລົງຂອງລັດຖະມັນຕີ ກະຊວງສຶກສາທິການ ແລະ ກິລາ ສະບັບເລກທີ 1172/ສສກ, ລົງວັນທີ 23 ມີນາ 2020 ວ່າດ້ວຍການໂຮມສູນຝຶກກິລາແຫ່ງຊາດ, ພະແນກວິທະຍາສາດການກິລາ ແລະ ໂຮງຮຽນພອນສະຫວັນກິລາ-ກາຍຍະກຳ ຍົກຖານະຂຶ້ນເປັນ ສະຖາບັນກິລາ-ກາຍຍະກຳ ໂດຍມີຈຸດປະສົງ ເພື່ອເປັນສະຖານການສຶກສາ ໃນການຈັດຕັ້ງການຮຽນ-ການສອນ, ຝຶກອົບຮົມ, ພັດທະນາຫຼັກສູດ, ຄົ້ນຄ້ວາວິໄຈ, ຜະລິດສື່ການຮຽນ-ການສອນ ແລະ ບໍລິຫານດ້ານວິຊາການ ເພື່ອຕອບສະໜອງຕາມຄວາມຮຽກຮ້ອງຕ້ອງການ ໃນ ການພັດທະນາວຽກງານກິລາ-ກາຍຍະກຳ.
ພາລະບົດບາດ ແລະ ໜ້າທີ່
ສະຖາບັນກິລາ-ກາຍຍະກຳ ມີພາລະບົດບາດເປັນເສນາທິການ ທາງດ້ານວິຊາການໃຫ້ແກ່ກົມກິລາລະດັບສູງ ກະຊວງສຶກສາທິການ ແລະ ກິລາ. ມີໜ້າທີ່ກໍ່ສ້າງ ແລະ ພັດທະນາບຸກຄະລາກອນກິລາ ແລະ ນັກກິລາ ຊື່ງໄດ້ມີການປະສານສົມທົບຮ່ວມມືກັບບັນດາພາກສ່ວນກິລາທີ່ກ່ຽວຂ້ອງ ເຊັ່ນ : ກົມກິລາລະດັບສູງ, ກົມການສຶກສາຊັ້ນສູງ, ຄະນະວິທະຍາສາດການກິລາ ມະຫາວິທະຍາໄລແຫ່ງຊາດ, ຄະນະກຳມະການໂອແລມປິກແຫ່ງຊາດລາວ, ບັນດາສະຫະພັນກິລາແຫ່ງຊາດ, ບັນດາກົມວິຊາການຂອງກະຊວງສຶກສາທິການ ແລະ ກິລາ, ວິທະຍາໄລພະລະສຶກສາ ແລະ ພາກສ່ວນກິລາທີ່ກ່ຽວຂ້ອງ ສ້າງຫຼັກສູດວິທະຍາສາດການກິລາ ລະດັບປະລິນຍາຕີ ລະບົບ 4 ປີ ໃນສາຂາວິຊາ ວິທະຍາສາດການອອກກຳລັງກາຍ ແລະ ກິລາ ທີ່ຈະເປີດການຮຽນ-ການສອນໃນສົກປີ 2020-2021.